Rådgivar digital læring

Vil du jobbe med kursutvikling og digitale verktøy i Tolletaten?

Tilsetjingsform: vikariat t.o.m. januar 2026

Tolletaten har ei viktig rolle som samfunnsbeskyttar, og samfunnsoppdraget vårt er å sikre etterleving av lover og reglar for grensekryssande vareførsel. I tråd med verksemdsstrategien til etaten skal digital dialog og tidleg informasjonsinnhenting gi rask, effektiv og korrekt handtering av varestraumen. Brei og målretta verkemiddelbruk skal bidra til auka etterleving før, under og etter grensepassering.

Vareførselsdivisjonen (VD), som er etablert med hovudkontor i Bergen, skal leggje til rette for korrekt og effektiv inn- og utførsel av varer for både næringslivet og privatpersonar. Divisjonen står framfor mange utviklingsoppdrag, og vi er i gang med fleire endrings- og utviklingsprosjekt.

Brukardialogavdelinga har mellom anna ansvar for å utvikle brukarvennlege og effektive digitale tenester gjennom tverrfagleg samarbeid med fagressursar i heile etaten. Stillinga er plassert i førebyggingsseksjonen i Bergen. Arbeidskvardagen din vil vere prega av samarbeid på tvers i organisasjonen og dialog med næringslivet. Du blir ein del av eit engasjert fagmiljø der du kan vere med og påverke, og du vil ha gode høve til å utvikle deg fagleg.

Arbeidsoppgåver

Digitale kurs er ein sentral del av menyen vår. Du vil inngå i eit team som har ansvar for å utvikle og gjennomføre ulike opplæringstiltak retta mot næringslivet. Du vil i stillinga

• ha ei sentral rolle i utviklinga av opplæringstiltak, som e-læring, Teams-kurs, webinar og opplæringsvideoar
• ha kontakt med næringslivet for å avdekkje behov for informasjon og opplæring
• samarbeide tett med fagmiljøa våre for å sikre innhald og produksjon av kurs
• vidareutvikle bruk av video og visuell framstilling av informasjon og fagstoff

Kvalifikasjonskrav

• relevant bachelorgrad (pedagogikk, innhaldsproduksjon, mediefag), eventuelt minst eitt års høgare utdanning med brei og relevant arbeidserfaring
• relevant erfaring med å utvikle, designe og gjennomføre kurs og opplæring
• erfaring med videoredigering
• svært god munnleg og skriftleg formuleringsevne
• ønskjeleg med kunnskap om UX-/UI-design og kva som skaper gode brukaropplevingar
• ønskjeleg med kunnskap om publisering og innhaldsproduksjon til nettstad

Personlege eigenskapar

• Du trivst med å drive prosessar framover.
• Du er nysgjerrig, kreativ og utviklingsorientert.
• Du har evne til å setje deg inn i nye fagområde, regelverk og arbeidsprosessar.

Vi legg stor vekt på personlege eigenskapar i stillinga.

Vi tilbyr

• interessante og utfordrande arbeidsoppgåver i ei verksemd med høg fagkompetanse, stort engasjement og mykje utviklingsvilje
• eit godt og tverrfagleg arbeidsmiljø
• pensjons-, forsikrings- og låneordningar i Statens pensjonskasse
• fleksibel arbeidstidsordning og tilbod om ein time bevegelse i arbeidstida i veka
• lønn som rådgivar etter statens regulativ ut fra bakgrunn og erfaring, i lønnsspenn frå 550 000 til 680 000 kroner
• arbeidsstad i Bergen i moderne kontorlokale i Solheimsviken med sykkelparkering, garderobar og tilgang til ei godt driven kantine

Tiltreding i vikariat så snart som mogleg, med lengde ut januar 2026.

Nærmare informasjon om stillinga kan du få ved å kontakte seksjonssjef for førebygging, Stig Løland, på telefon 414 49 986.

Bakgrunnssjekk
Vi nyttar Semac bakgrunnssjekk på aktuelle kandidatar.

Krav til søknaden
Fyll ut felta «Utdanning» og «Arbeidserfaring» og last opp relevante vitnemål og eventuelle attestar.

Mangfald og inkludering

Tolletaten meiner at mangfald og inkludering er ei styrke. Vi ønskjer medarbeidarar med ulike bakgrunnar, kompetansar, erfaringar og perspektiv for å løyse vårt samfunnsoppdrag. Mangfald bidreg til auka kreativitet, betre avgjerdsprosessar, større fleksibilitet og styrkjer kulturen og arbeidsmiljøet vårt. Vi oppmodar alle kvalifiserte kandidatar til å søkje. Dersom det er kvalifiserte kandidatar som har funksjonsnedsetjing, hol i CV-en eller innvandrarbakgrunn, vil minst éin søkjar frå kvar av desse gruppene bli invitert til intervju. For at du skal bli vurdert som søkjar i desse gruppene, må du oppfylle krava til positiv særbehandling. Du kan lese meir om positiv særbehandling på arbeidsgjevarportalen. Dersom du har behov for individuell tilrettelegging på arbeidsplassen eller i arbeidsforholdet, vil vi prøve å imøtekome dette så langt det let seg gjere.