Dekan ved Fakultet for lærarutdanning, kultur og idrett

Høgskulen på Vestlandet søkjer dekan for Fakultet for lærarutdanning, kultur og idrett i fireårig åremålsstilling, med tiltreding 01.08.2025.  

Dekanen har det overordna ansvaret for at fakultetet sine utdanningar, forskings- og utviklingsverksemd og formidlingarbeid held høg kvalitet. Dekanen skal sørge for at innovasjon og internasjonalisering vert ein integrert del av den faglege verksemda. Tilrettelegging for fagleg samhandling internt og på tvers av fakulteta er ei viktig oppgåve.  

Som fakultetet sin øvste faglege og administrative leiar er dekanen ansvarleg for utviklinga av fakultet. Dekanen er vitskapleg og administrativt ansvarleg på fakultetet sitt område. 

Dekanen skal aktivt bidra til å styrke høgskulen sitt samspel med samfunns- og arbeidsliv i kunnskaps-utviklinga på heile Vestlandet. Dekanen har ansvar for å styrke det tverrfaglege og interfakultære samarbeidet, og skal bidra til berekraftig utvikling av alle våre campus. 

Dekanen har sitt mynde delegert frå rektor, og er del av rektor si leiargruppe. Dekanen har medansvar for heilskaplege løysingar for å realisere høgskulens strategi, målsetjingar og verdigrunnlag. 

Du har ein sterk motivasjon for bidra i å vidareutvikle høgskulen som ein viktig regional, nasjonal og internasjonal kunnskapsaktør med høg kompetanse. Ditt leiarskap bidrar til at studentar og tilsette ved HVL har eit trygt, inkluderande og stimulerande fag- og arbeidsmiljø, med ein felles organisasjonskultur der demokrati og medverknad er ein viktig del av identiteten og styreforma.

Det er forventa at dekanen vil vere synleg på dei campus fakultetet er representert. Det må påreknast ein del reiseverksemd. 

Dekan har følgjande arbeidsoppgåver og ansvar:

• Ansvarleg for høg kvalitet i fakultetet sine utdanningar, forskings- og utviklingsverksemd og formidlingsarbeid 
• Leie arbeidet med å utvikle utdanningsverksemd og læringsmiljø på fakultetet
• Sjå til at HVL rekrutterer best mogeleg kvalifiserte studentar og tilsette 
• Sikre at fakultetet sine utdanningar er tilpassa samfunnet og den einskilde sitt behov for livslang læring
• Sikre rammevilkår for at fakultetet sitt faglege personale kan utvikle og drive FoU-verksemd av høg kvalitet  
• Ta del i det nyskapande samspelet med samfunns- og arbeidsliv i regionane
• Ta medansvar i forming av administrative tenester i samsvar med institusjonelle retningsliner
• Ta del i vidareutvikling av det tverrfaglege og interfakultære samarbeidet  
• Ta medansvar i berekraftig utvikling på alle campusane våre 

Dekanen er ansvarleg for fakultetet si samla ressursforvalting og har budsjettansvar. Dekanen er øvste arbeidsgjevaransvarleg i fakultetet, og har overordna HMS-ansvar for fakultetet sine tilsette. Ivaretaking av eit godt partssamarbeid og tilrettelegging for medverknad frå tilsette og studentar i fakultetet ligg til rolla. 

Dekanen har òg ansvar for at forvaltingsoppgåvene vert ivaretekne med god kvalitet og at oppgåveløysinga er i samsvar med god forvaltingspraksis. 

Dekanen kan få andre ansvars-/arbeidsoppgåver enn dei som står i utlysinga. Det kan kome til endringar i styringsforma i fakulteta i løpet av åremålet som kan få konsekvensar for dekanen sin mynde.

Mynde
Mynde i stillinga er delegert frå rektor, og dekanen rapporterer til rektor.  

Kvalifikasjonskrav:

Formell utdanning og kompetanse:

• Relevant høgare utdanning og høg vitskapleg kompetanse, helst på førstestillingsnivå 
• Dokumentert kompetanse og erfaring innanfor fakultetet sitt fagområde
• Leiarerfaring, dokumenterte resultat frå fagleg leiarstilling og resultat frå strategi og endringsarbeid blir vektlagt

Generelle kompetansekrav

• Ein motiverande og inkluderande leiarstil med vekt på samarbeid og medverknad 
• God forståing for høgskulen sitt samfunnsoppdrag
• Forståing for verdien av kontinuerleg arbeid med likestilling og mangfald i utdanningane og i rekrutteringa av studentar og tilsette 
• God pedagogisk kompetanse, og god forståing for kunnskapsformidling og læreprosessar 
• Erfaring frå, og solid kunnskap om, universitets- og høgskulesektoren 
• Erfaring frå, og kjennskap til, dei profesjonar og praksisfelt som fakultetet femner om er ein føremon
• Erfaring med å utvikle og vedlikehalde relasjonar til ulike aktørar regionalt, nasjonalt og internasjonalt
• God innsikt i og erfaring frå å forløyse potensialet i digitale løysingar 
• God munnleg og skriftleg framstillingsevne i norsk og engelsk

Personlege eigenskapar:

• Gode leiareigenskapar 
• Evne til strategisk heilskapleg perspektiv 
• Gode evner til kommunikasjon, samhandling og til å bygge tillit og relasjonar internt og eksternt 
• Gjennomføringsevne og resultatorientering 
• Løysings - og utviklingsorientering 
• Stort engasjement for å nå høgskulen sine ambisjonar 

Arbeidsstad er ein av høgskulen sine campus i Bergen, Sogndal eller Stord.

Vi tilbyr:

• Gode pensjons-, forsikrings-, og låneordningar i Statens pensjonskasse
• Spennande fagmiljø med moglegheit for kompetanseheving - og utvikling
• Høve for trening i arbeidstida

Stillinga som dekan er løna etter Statens lønsregulativ, i stillingskode 1474. Løn etter avtale.

Frå løna vil det bli trekt 2 % innskot til Statens pensjonskasse.

Korleis søke på stillinga?

Send søknad og CV ved å klikke på knappen merka "Søk stilling" på denne sida.

Det er søkjar sitt ansvar å sørgje for at alle relevante vedlegg er lagt inn innan fristen, som attester og vitnemål. Dersom vitnemål, karakterutskrifter eller anna dokumentasjon ikkje er på eit skandinavisk språk eller engelsk, må søkjar sjølv laste opp attesterte omsetjingar. Dersom vedlegga overskrid 50 MB må dei komprimerast før opplasting eller leggjast ved som lenkje.

Søkjarar med utanlandsk utdanning må i tillegg dokumentere at utdanninga samsvarar med norsk bachelor-, master-eller ph.d.-grad.  Sjå www.hkdir.no for meir informasjon om vurdering av høgare utdanning.  (https://hkdir.no/utdanning-fra-utlandet/jeg-har-utdanning-fra-utlandet/sok-godkjenning-av-hoyere-utdanning-bachelor-master-ph-d)

Søknadar kan ikkje sendast på e-post til enkeltpersonar ved høgskulen.

Generell informasjon:

Vi gjer merksam på at unntak frå den offentlege søkjarlista blir handsama etter reglane i Offentleglova. Søkjarar som har bede om slikt unntak, blir varsla dersom ønskje ikkje vert teke til følgje.

Den statlege arbeidsstyrken skal i størst mogleg grad spegle mangfaldet i befolkninga. Det er derfor eit personalpolitisk mål å oppnå ei balansert alders- og kjønnssamansetjing og rekruttere personar med minoritetsbakgrunn, nedsett funksjonsevne og hol i CV.

Arbeids- og opphaldsløyve i Norge er ein føresetnad for å tiltre stillinga. 

Høgskulen på Vestlandet er underlagt forskrift for eksportkontrollsystem. Forskrifta kan komme til anvending i behandlinga av søknadane.

Vi tek atterhald om at stillinga si plassering i organisasjonen kan bli endra som følgje av ev. justeringar i HVL si interne organisering.

Inkludere, utfordre og samhandle

Les meir på våre heimesider. (https://www.hvl.no/)