Stipendiatstillingar i helse- og sosialfag

Om stillinga

Høgskulen i Volda søkjer etter stipendiatar til Avdeling for Samfunnsfag og historie, Institutt for sosialfag (ISF). Vi har inntil tre ledige stillingar knytt til doktorgradsprogrammet i helse- og sosialfag. Vi tar imot søknadar med tema som har relevans for helse- og sosialfagleg arbeid, til dømes knytt til minoritetsperspektiv i sosialt arbeid eller tverrprofesjonelt/tverretatlegsamarbeid). Vi er særleg interessert i gode prosjekt som er relevante for arbeid med born, unge og familiar. Vi vil nemne to aktuelle innretningar med utgangspunkt i dette:

• Profesjonsutøving i rusarbeid retta mot ungdom. Det å arbeide med ungdom som bruker rusmiddel på problematiske måtar kan innebere andre utfordringar og moglegheiter for profesjonsutøvaren enn når brukaren er vaksen. Det er behov for meir kunnskap om korleis profesjonsutøvarar opplever å arbeide med ungdom med problematisk rusmiddelbruk, og korleis dei vurderer og handterer særlege utfordringar og moglegheiter i møte med denne gruppa.

 

• Barnevernet sitt arbeid med partnarvald.Vald i nære relasjonar er den nest hyppigaste årsaka til bekymringsmeldingartil barnevernet. Det manglar kunnskap om korleis barneverntenestene vurderer meldingar som omhandlar vald mellom dei føresette, korleis tilsette i barnevernet forstår vald som fenomen og konsekvensane av å oppleve vald i familien. 

 

Vi inviterer søkarar til eit digitalt seminar onsdag 5. mars, kl. 14-15 der vi vil orientere om utlysinga, gi tips til utarbeiding av gode prosjektskisser og kva som blir vektlagt i vurderinga av søknader. Det blir høve til å stille spørsmål. Du kan melde deg på til  søkarseminaret her: https://nettskjema.no/a/491494 (https://nettskjema.no/a/491494)

Stipendiatstillingane er utdanningsstillingar som først og fremst skal gi lovande forskarar høve til fagleg utvikling. Stillingane har forskarutdanning fram til doktorgrad som mål. Stipendiatstillingane er viktige rekrutteringsstillingar til vitskapelege stillingar ved universitet og høgskular. 

Stipendiatane vert tilsette for ein periode på tre år med rein forskarutdanning, eller fire år med forskarutdanning og 25 prosent arbeidsplikt. Arbeidsplikta kan bestå av undervisning, rettleiing og liknande. Arbeidet vil vere relevant for doktorgradsarbeidet. Ordninga med fire år forskarutdanning må avtalast særskilt med avdelingsleiinga ved tilsetting.Tidpunkt for tilsetjing blir avklara i tilsetjingsprosessen. 

Arbeidsstad er ved Høgskulen i Volda. Som tilsett ved høgskulen får stipendiatar tenlege kontor og utstyr, og får tildelt årlege driftsmidlar etter gjeldande satsar.

Eit vilkår for å starte i stillinga er opptak i doktorgradsprogrammet i helse og sosialfag ved Høgskulen i Volda/Høgskolen i Molde. Dokumentasjonen på opptak i doktorgradsprogrammet må ligge føre innan seks månader etter at ein har fått tilbod om stipendiatstilling. Ein vil då inngå endeleg avtale om å starte i stillinga. Vilkår for opptak til doktorgradsprogrammet går fram i Utfyllenderetningslinjer for ph.d.-studium i helse- og sosialfagsom du finn her (https://www.himolde.no/studier/om/studiekvalitet/kvalitetssystem/ph.d/ph.d.-i-helse--og-sosialfag/index.html/).

Om ph.d.- programmet i helse- og sosialfag: Profesjonsutøving; vilkår og utvikling

Høgskulen i Volda og Høgskolen i Molde tilbyr i fellesskap doktorgradsutdanninga Helse- og sosialfag: Profesjonsutøving - vilkår og utvikling. Programmet er tverrprofesjonelt og tverrfagleg. Utdanninga rettar seg mot alle profesjonar i helse- og sosialsektoren, og inkluderer bidrag frå fleire vitskapsdisiplinar. Programmet har eit breitt fagleg fellesskap av kandidatar og rettleiarar. Våren 2025 er det  38 kandidatar tatt opp på programmet Doktorgradprosjekta i utdanninga nyttar både kvantitative og kvalitative metodar og ‘mixed methods'. Doktorgradsprogrammet er eit tilbod til kandidatar som har relevant fagbakgrunn og master / hovudfag. Les meir om ph.d.-programmet her (https://www.hivolda.no/studietilbod/phd-studium-helse-og-sosialfag-profesjonsutoving-vilkar-og-utvikling/haust).

Kvalifikasjonar

Søkjarar må ha fullført mastergradutdanning som er relevant for utlysinga innanfor sosialfag, helsefag, samfunnsvitskaplege fag eller rettsvitskap, eller tilsvarande, , og normalt med karakteren B eller betre på masteroppgåva. Dersom du har tilsvarande utdanning til mastergrad, eller utdanning frå utlandet, må du legge ved godkjenning frå NOKUT.

Vitskaplege kvalifikasjonar utover mastergrad, som er relevante for fagområda til stillinga, vil også bli vektlagde. Det same gjeld relevant arbeidserfaring frå undervisning.

Ved vurdering av søkjarane vil det bli lagt stor vekt på prosjektideen og prosjektskissa som ligg ved søknaden. Prosjektskissa skal vere på maksimalt 10 sider. Det skal kome fram kva du ønskjer å forske på, kvifor dette er relevant og i samsvar med utlysinga, og kva som er forskingsstatus på feltet. Skissa skal gjere greie for dei teoretiske og metodiske utgangspunkta for prosjektet og for kva empiri/datagrunnlag ein tek sikte på å bruke.

Det blir arrangert eit digitalt søkjarseminar knytt til utlysinga onsdag5. mars, kl. 14-15 der vi vil orientere om utlysinga, gi tips til utarbeiding av gode prosjektskisser og kva som blir vektlagt i vurderinga av søknader. Du kan melde deg på til  søkarseminaret her:  https://nettskjema.no/a/491494 (https://nettskjema.no/a/491494)

Det vil bli gjennomført intervju og referansesjekk av aktuelle kandidatar for å vurdere personlege føresetnadar for å gjennomføre forskarutdanninga. Motivasjon og potensial for forsking innanfor fagfeltet er viktige føresetnader. Du må ha stor arbeidskapasitet, vere strukturert og ha forståing for at eit doktorgradsløp er ein krevjande læringsprosess. Du må kunne arbeide sjølvstendig, vere nytenkande og kreativ. 

Du må ha gode norsk- og engelskkunnskapar, både skriftleg og munnleg. Undervisings- og administrasjonsspråket ved høgskulen er norsk.

Om instituttet

Institutt for sosialfag er eit institutt ved Avdeling for samfunnsfag og historie. Institutt for sosialfag har 22tilsette i faste vitskaplege stillingar og per i dag 11 stipendiatar. Ved instituttet er det i alt omlag 500 studentar. Instituttet har ansvar for to bachelorprogram i sosialt arbeid: barnevernspedagog og sosionom, med meir enn 300 studentar fordelte på tre studieår.

Instituttet tilbyr mastergradutdanning i helse- og sosialfagog mastergradutdanning i barnevernsarbeid. Innhaldet i dei to mastergradane er omtalt i studieplanen for helse- og sosialfag (https://www.hivolda.no/studietilbod/helse-og-sosialfag/haust-0#acc-study-plan-id) og i studieplanen for barnevernsarbeid (https://www.hivolda.no/studietilbod/barnevernsarbeid/haust-0). Alle emna i masterprogrammet og vidareutdanningstilboda er samlingsbaserte. 

Vi tilbyr

HVO tilbyr varierte arbeidsoppgåver i ei spanande og viktig verksemd.

Avdelinga for samfunnsfag og historie har eit inkluderande og godt fagleg arbeidsfellesskap, der det er høve til fagleg og personleg utvikling. Høgskulen i Volda har gode vilkår for forsking, og det finst fleire aktive forskargrupper på ulike fagfelt.

Pensjonsordningane ved høgskulen er gode. Stipendiatstillinga er løna i statens lønsregulativ, og ved HVO er stipendiatar si startløn kr.532 200 for deisom er organisert under Akademikerne/Unioog kr. 536200for deisom er organisert under LO Stat/YS Stat. For begge grupper er det lagt opp til automatisk lønnsutvikling i inntil 4 år med 3 % årlig stigning.

Generell informasjon

Ved HVO er vi opptatt av mangfald. Medarbeidarar med ulik livserfaring vil gjere oss i stand til å finne  gode løysingar på arbeidet vårt. Vi oppmodar difor alle til å søke stillinga utan omsyn til alder, kjønn, funksjonsevne eller etnisk bakgrunn. Du er også velkommen til å søke sjølv om du ikkje kan vise til ei samanhengande yrkeskarriere. Lokala er universelt utforma, og vi legg tilhøva til rette for personar med nedsett funksjonsevne.

Dersom du har nedsett funksjonsevne, innvandrarbakgrunn eller hol i CV kan du bli positivt særbehandla om du kryssar av for dette når du søker stillinga. Vi vil invitere minst éin kvalifisert søkar i kvar av desse gruppene til intervju. For å bli positivt særbehandla på denne måten, må du oppfylle visse krav. Les meir om dette på arbeidsgiverportalen (https://arbeidsgiver.difi.no/strategisk-hr-og-ledelse/inkluderingsdugnaden/hvordan-bli-en-mer-inkluderende-virksomhet).

Tilsetjing skjer på dei vilkåra som følgjer av lov om offentlege tenestemenn, regulativ, reglement og instruksar som til ei kvar tid gjeld for stillinga, mellom anna lovfesta innskot i Statens pensjonskasse.

Aktuelle kandidatar vert innkalla til intervju. Søkjarar som vert kalla inn til intervju, må ta med originalar av vitnemål og attestar for å dokumentere dei elektronisk innsende vedlegga.

Om søknaden

Alle som søker stillinga må søke digitalt gjennom rekrutteringsportalen Jobbnorge. Du må laste opp relevante vitnemål og attestar. Vi gjer merksam på at søknaden blir vurdert ut frå informasjon som ligg føre ved utløp av søknadsfristen. Det er viktig at du viser korleis din kompetanse fyller kriteria for stillinga

Offentleg søkarliste blir utarbeidd etter at søknadsfristen er ute. Dersom du ønsker å reservere deg frå oppføring på offentleg søkarliste, må dette grunngjevast i Jobbnorge. Du vil bli varsla om reservasjon ikkje blir tatt til følge.

Følgjande dokument/filer skal leggjast ved den elektroniske søknaden:

• vitnemål og attestar
• CV
• masteroppgåve
• eventuelle andre vitskaplege arbeid
• prosjektskisse, sjå informasjon lenger oppe i teksten

Vedlegga skal ha namn som samsvarar med innhaldet i fila.

Søkjarane blir vurderte av eit sakkunnig utval. Alle innkomne søknader blir først vurderte av avdelinga. Søknader frå klart ikkje-kvalifiserte søkjarar blir ikkje sende vidare til vurdering i sakkunnig utval.

Kontakt

Nærare opplysningar om stillinga får du ved å vende deg til:

• Kjartan Leer-Salvesen, e-post: Kjartan.Leer-Salvesen@hivolda.nomobil: 416 59 805, programansvarleg for doktorgradsprogrammet
• Finn Ove Båtevik e-post:batevik@hivolda.no, tlf. 70 07 52 13, instituttleiar ved ISF
• Jorunn Sem Fure, e-post: jorunn.sem.fure@hivolda.no, tlf. 97 79 71 94, dekan ved ASH

Om avdelinga/eininga

Avdeling for samfunnsfag og historie har undervisningsansvar for omlag 1350 studentar, fordelte på tre institutt: Institutt for planlegging, administrasjon og skulerettasamfunnsfag (IPAS), Institutt for sosialfag (ISF) og Historisk institutt (HI).

Studiebygda Volda

Midt mellom fjord og fjell på spektakulære Sunnmøre finn du Høgskulen i Volda, med sine lange tradisjonar.

Les meir på www.hivolda.no (https://www.hivolda.no/)

 

Video: https://www.youtube.com/watch?v=wSlL1WkuUXc