Rådgivar - forsking og innovasjon

Vil du bli vår nye nøkkelspelar i arbeidet for å auke finansiering til nyskapande forsking- og innovasjonsprosjekt med mål om å auke innovasjonskrafta i sjukehuset?

Forsking og innovasjon lyser no ut ei fast stilling som rådgivar. Rådgivaren skal jobbe i skjeringspunktet mellom forsking og innovasjon. Vi ser etter ein dyktig medarbeidar som skal støtte satsinga på forsking og innovasjon i sjukehuset.

Stillinga ligg til eininga Forsking og innovasjon ved Forskings- og utviklingsavdelinga. Eininga har ansvar for støtte- og rettleiingstenester innan forsking for alle sjukehusa i helseregionen, og for innovasjon i Haukeland universitetssjukehus. Forsking og innovasjon har ca. 65 medarbeidarar med høg kompetanse på ulike fagområde innan medisin, helsefag, kommunikasjon, jus, økonomi og forvaltning. Vi har ansvar for regionalt kompetansesenter for klinisk forsking, for å legge til rette for regionalt samarbeid om forsking, vi tilbyr regional forskingsstøtte til kliniske studiar, og har ansvar for regionalt kompetansemiljø for metodevurderingar og har ei leiande rolle i felles nasjonale forskingsadministrative system og i oppfølging av nasjonale tenester i spesialisthelsetenesta. Forsking og innovasjon bidrar og i regionale, nasjonale og europeiske nettverk for forsking- og innovasjon.

Forsking og innovasjon er bindeledd mot universitets- og høgskulebaserte forskingsmiljø, og har viktige roller i regionale og nasjonale nettverk for forsking og i oppfølging av sjukehuset sitt samarbeid med næringsliv og andre forskingsaktørar. Målsettinga for vårt arbeid er at forsking og innovasjon skal styrkast både i kvantitet og kvalitet ved å gi profesjonell forskings- og innovasjonsstøtte til fagmiljøa ved sjukehuset.

Rådgivaren skal mellom anna jobbe opp mot relevante innovasjonsutlysingar, følge opp sjukehuset si satsing for å få auka tilslag frå dei store programma til Norges forskningsråd som SFF, SFI og forskingsinfrastruktur og i EU sitt rammeprogram for forsking og innovasjon. Stillinga er del av eit eige team på Forsking og innovasjon med juristar, innovasjons- og forskingsrådgivarar og personvernrådgivar. Her vil du mellom anna inngå som ein sentral medarbeidar i vårt nye innovasjonsprogram som skal legge til rette for at vi kan få fleire innovasjonsprosjekt i sjukehuset. Ei sentral oppgåve for teamet er å støtte forskingsmiljøa og sjukehusleiinga i samband med søknader om nye forskingsmidlar. Forsking og innovasjon er ei av hovudoppgåvene i helsetenesta, der eit sentralt verkemiddel er søknader om midlar frå mellom anna Norges forskingsråd og EU.

Vi ser etter ein medarbeidar som kan vere ein pådrivar for utvikling av innovasjonsprosjekt og aktivitetar i samarbeid med leiinga, tilsette og klinikkane. Stillinga inneber mykje kontakt med dei kliniske fagmiljøa og eksterne samarbeidspartnarar og skal mellom anna vere med på å etablere nye møteplassar for innovasjon ved sjukehuset. Rådgivaren må og følge utviklinga på saksfelta, både nasjonalt og internasjonalt, og vil arbeide i eit team med svært engasjerte og dyktige kollegaer på tvers av heile avdelinga. Den som blir tilsett vil sjølv kunne bidra i utvikling av området og stillinga. Vi ønsker deg velkommen til å vere med på dette laget.

Arbeidsoppgåver

• Samarbeide med sjukehuset sine klinikkar, leiing og avdelingar om å auke gjennomslag i nasjonale og internasjonale forskingsprogram, med vekt på utlysingar innan innovasjon
• Gi råd og støtte til tilsette som skal søke om midlar frå Horisont Europa og Forskingsrådet sine store verkemiddel. Bidra med å koordinere søknadsprosessar saman med desse
• Bidra til å bygge innovasjonskompetanse i klinikkane og fagmiljøa ved sjukehuset og fremme og støtte innovasjonsarbeid i organisasjonen som heilskap
• Inngå i eit team som følger opp sjukehuset sin delplan for forsking og innovasjon og arbeide med verkemidla i sjukehuset for innovasjon
• Vere med på å knytte kontakt mellom fagmiljø og næringsliv som ledd i å styrke innovasjonsarbeidet og yte støtte til utvikling av institusjonelle verkemiddel som kan auke innovasjonsaktivitet i sjukehuset
• Delta i utvikling og gjennomføring av kurs for tilsette
• Andre oppgåver kan bli aktuelle ved behov

Kvalifikasjonar

• Kompetanse på masternivå
  
• Erfaring frå forskings- og innovasjonsfeltet, ekstern prosjektfinansiering og -oppfølging er ein fordel
• Solid kunnskap om EU og Forskingsrådet sine forskingsprogram er ein fordel
• God kjennskap til innovasjonsprosessar og arbeid i store og komplekse organisasjonar
• Solid utgreiings- og saksbehandlarerfaring
• Erfaring med å halde presentasjonar og kurs er ein fordel
• Erfaring frå prosjekt- og prosessutvikling er ein fordel
• God munnleg og skriftleg framstillingsevne på norsk og engelsk

Personlege eigenskapar

• Gode samarbeids- og kommunikasjonseigenskapar
• Ein pådrivar med stor arbeidskapasitet
• Systematisk, analytisk og evne til sjølvstendig oppfølging og gjennomføring av arbeidsoppgåver
• Initiativrik, fleksibel og serviceinnstilt
• Opptatt av kunnskapsdeling og utvikling
• Evne til å sette i gang, leie og evaluere prosessar og halde oversyn over fleire parallelle arbeidsprosessar både hos seg sjølv og andre
• Personlege eigenskapar for stillinga vil bli lagt vekt på

Vi tilbyr

• Spennande utfordringar i ein organisasjon i sterk utvikling med dyktige og engasjerte kollegaer
• Interessante og krevjande arbeidsoppgåver
• Lønn etter avtale

Vi oppfordrar alle søkarar til å nytte Vitnemålsportalen for å laste opp verifiserte vitnemål og karakterutskrifter, der det er mogleg. Har du utdanning frå utlandet, legg ved godkjenning frå Direktoratet for høgare utdanning og kompetanse.

Vi ønsker å spegle mangfaldet i befolkninga i rekrutteringa vår. Vi oppmodar alle som er kvalifiserte til å søke ledige stillingar uansett, alder, funksjonsevne og fleirkulturell bakgrunn. Det same gjeld dersom ein har hatt eit lengre opphald frå arbeidslivet. Føretaksgruppa i Helse Vest ønsker å legge til rette for inkluderande rekruttering.