Leiar transitteringsseksjonen, Tolletaten

Blir du motivert av ein leiarjobb med nasjonalt fagansvar, i ein internasjonal kontekst med eit viktig samfunnsoppdrag?

Tolletaten har ei viktig rolle som samfunnsbeskyttar, og samfunnsoppdraget vårt er å sikre etterleving av lover og reglar for grensekryssande vareførsel. I tråd med verksemdsstrategien til etaten skal digital dialog og tidleg informasjonsinnhenting gi rask, effektiv og korrekt handtering av varestraumane. Brei og målretta verkemiddelbruk skal bidra til auka etterleving før, under og etter grensepassering.

Vareførselsdivisjonen (VD) skal leggje til rette for korrekt og effektiv inn- og utførsel av varer for både næringslivet og privatpersonar og er etablert med hovudkontor i Bergen. Divisjonen står framfor mange utviklingsoppdrag, og vi er i gang med fleire endrings- og utviklingsprosjekt.

Transitteringsseksjonen er lokalisert i Oslo og har 16 medarbeidarar. Seksjonen er nasjonal eining for autorisering og oppfølging av transitteringssaker. Arbeidet inneber samhandling med andre nasjonar som er tilknytte transitteringskonvensjonen, og eit ansvar for å ivareta Noregs plikter etter konvensjonen.

Sentrale arbeidsoppgåver:
Som leiar vil du ha eit heilskapleg ansvar for å leie seksjonen administrativt og fagleg. Du rapporterer til avdelingsdirektøren (i Bergen) for regelavdelinga og er medlem av leiargruppa til regelavdelinga.
Seksjonsleiaren har hovudansvar for oppgåvene som til kvar tid ligg til eininga:

• Som leiar har du personal- og leiaransvar for medarbeidarane i eininga og skal kjenne til, nytte og utvikle ressursane i personalgruppa på best mogleg måte.
• Du vil samarbeide med andre einingar internt i etaten og med aktuelle eksterne samarbeidspartnarar for å nå måla som er sette.
• Leiaren skal ha oversikt over og følgje opp endringar i transitteringskonvensjonen og anna relevant regelverk frå EU.
• Du skal bidra til å sikre god brukardialog og samhandling med næringa som nyttar transitteringsprosedyren.
• Undervisnings- og foredragsoppgåver inngår i stillinga, og du må rekne med at det kan bli noko reising.

Kvalifikasjonar:

• Du har bachelorgrad innanfor relevante fagområde, gjerne leiingsfag. Bestått fordjupingsnivå på Tolletatens kompetansesenter og svært god realkompetanse kan erstatte kravet om bachelorgrad.
• Du har erfaring frå arbeid med leiings- og resultatansvar.
• Du har svært god munnleg og skriftleg formuleringsevne på norsk og kan nytte engelsk som arbeidsspråk.

Ønskjeleg med erfaring frå

• organisasjonsutvikling, forbetringsprosessar og automatisering
• arbeid med internasjonalt samarbeid
• samarbeid på tvers av ulike etatar eller organisasjonar
• ulike roller i komplekse organisasjonar

Vi søkjer deg som

• er trygg i rolla di og har tillit til eigne leiareigenskapar
• tek ansvar og bruker ressursane i seksjonen for å nå mål og skape resultat
• har evne til å prioritere mellom ulike leveransar
• er ein motiverande leiar som sikrar god koordinering i eininga
• har organisasjonsforståing, er utviklingsorientert og ønskjer å vere med i vidareutviklinga av seksjonen

Du må kunne levere uttømmande politiattest ved tilbod om tilsetjing.

Leiarplakaten til Tolletaten kommuniserer leiingsprinsipp som er retningsgivande for leiarane våre. Som leiar i Tolletaten er det nødvendig at du løftar blikket, er ein god rollemodell og bidreg til verdiskapande samfunnsvern ved å gjennomføre, utvikle og samhandle. Vidare er det viktig at du har høg integritet, er løysingsorientert og har evne til å skape eit godt arbeidsmiljø.

Vi kan tilby

• eit arbeidsmiljø med fagleg engasjerte medarbeidarar
• gode høve til utvikling i ein etat med eit viktig samfunnsoppdrag
• fleksibel arbeidstidsordning
• pensjons-, forsikrings- og låneordningar i Statens pensjonskasse
• arbeidsplass sentralt i Oslo på Helsfyr
• lønn som underdirektør etter statens lønnsregulativ, lønnsspenn frå kr 800 til 900 000, avhengig av bakgrunn og kvalifikasjonar (for spesielt kvalifiserte søkjarar kan høgare lønn vurderast

For ytterligere informasjon kan avdelingsdirektør June Nesse kontaktes på 477 97 831

Bakgrunnssjekk
Vi nyttar Semac bakgrunnssjekk på aktuelle kandidatar.

Krav til søknaden
Fyll ut felta «Utdanning» og «Arbeidserfaring» og last opp relevante vitnemål og eventuelle attestar.

Mangfald og inkludering

Tolletaten meiner at mangfald og inkludering er ei styrke. Vi ønskjer medarbeidarar med ulike bakgrunnar, kompetansar, erfaringar og perspektiv for å løyse vårt samfunnsoppdrag. Mangfald bidreg til auka kreativitet, betre avgjerdsprosessar, større fleksibilitet og styrkjer kulturen og arbeidsmiljøet vårt. Vi oppmodar alle kvalifiserte kandidatar til å søkje. Dersom det er kvalifiserte kandidatar som har funksjonsnedsetjing, hol i CV-en eller innvandrarbakgrunn, vil minst éin søkjar frå kvar av desse gruppene bli invitert til intervju. For at du skal bli vurdert som søkjar i desse gruppene, må du oppfylle krava til positiv særbehandling. Du kan lese meir om positiv særbehandling på arbeidsgjevarportalen. Dersom du har behov for individuell tilrettelegging på arbeidsplassen eller i arbeidsforholdet, vil vi prøve å imøtekome dette så langt det let seg gjere.