Fast stilling i kulturvernavdelinga

Om stillinga

Kultur- og likestillingsdepartementet (KUD) har ledig ei fast stilling som rådgjevar/seniorrådgjevar i kulturvernavdelinga, i den seksjonen som har ansvar for fagområda arkiv, bibliotek, museum, kulturbygg og visuell kunst. 

Den som blir tilsett i stillinga vil primært få medansvar for forvalting av statlege tilskot til museum og vil òg få oppgåver knytte til utvikling og gjennomføring av politikk på heile arkiv-, bibliotek- og museumsområdet (ABM-området). 

Vi ønskjer å tilsetje deg som ser framover med eit positivt blikk, har interesse for offentleg forvalting, endringsprosessar og utviklingsliner, og ønskjer å bidra til arbeidet med å ta vare på nasjonens kollektive minne. Du blir òg motivert av å sikre god støtte til den politisk leiinga på museumsområdet og kulturvernområdet elles. 

KUD er eit departement prega av mykje offentleg engasjement kring sakene våre. Ansvarsområda er viktige for samfunnet, og arbeidskvardagen kan vere hektisk. Du vil bli del av eit tverrfagleg miljø med mange engasjerte og kompetente medarbeidarar, og vil jobbe innanfor korte fristar med høgt arbeidstempo.

Arbeidsoppgåver

Som rådgjevar/seniorrådgjevar hos oss vil du mellom anna:

• bidra til god, føreseieleg tilskotsforvalting på museumsområdet
• gi god støtte til den politisk leiinga, inkludert å klargjere talepunkt, bakgrunnsnotat og anna skriftleg materiale
• halde deg oppdatert, analysere utviklinga og gje råd om vidareutvikling av saksfeltet 
• handsame komplekse saker og bidra med utgreiingar knytte til arkiv-, bibliotek- og museumsområdet

Godt samarbeid er viktig for eit velfungerande departement. Stillinga inneber samarbeid med andre departement, underliggjande etatar og andre forvaltingsnivå. Departementet ønskjer at alle medarbeidarar skal bruke kompetansen sin for å støtte kollegaer, også på tvers. Den som blir tilsett må vere budd på å stille kompetansen sin til rådvelde for andre seksjonar og avdelingar.

Kvalifikasjonar

Du må ha:

• høgare utdanning på mastergradnivå (lang erfaring kan kompensere for kravet til utdanning).
• god forståing av forholdet mellom politikk og forvalting, og av embetsrolla
• god evne til å uttrykkje deg skriftleg og munnleg
• interesse og forståing for fagområda til avdelinga og ei grunnleggjande samfunnsinteresse
• minimum to års relevant erfaring

Det er ein fordel om du har:

• erfaring frå offentleg forvaltning
• erfaring med utgreiingsarbeid eller analysearbeid

Personlege eigenskapar:

• du arbeider strukturert og sjølvstendig, og sikrar framdrift i arbeidsprosessar
• du har stor gjennomføringsevne, høg arbeidskapasitet og gode analytiske evner
• du samarbeider godt med andre, er fleksibel og tek initiativ
• du har evne til å formidle varierte og komplekse problemstillingar
• du har godt humør

Vi legg vekt på om du er personleg eigna til stillinga.

Vi bruker bakgrunnssjekk frå Semac i rekrutteringsprosessane våre, og godkjend bakgrunnssjekk er ein føresetnad for tilsetjinga.

Den som blir tilsett i stillinga, må kunne autoriserast for tilgang til informasjon som er gradert som BEGRENSET etter sikkerhetsloven.

Vi tilbyr

• innplassering som rådgjevar/seniorrådgjevar med ei brutto årslønn frå kr 575 000 til 860 000 kroner 
• trivelege lokale midt i Oslo sentrum med godt kantinetilbod
• fleksibel arbeidstid, med sommar- og vintertid
• høve til å trene i arbeidstida, tilgang til treningsrom og treningstilbod
• medlemskap i Statens pensjonskasse (SPK) med gode vilkår for pensjon, bustadlån og forsikring
• introduksjonsprogram for nytilsette og gode høve til kompetanseutvikling gjennom KUD-skolen og Departementsakademiet
• eit kunnskapsrikt, inkluderande og uformelt arbeidsmiljø

Kvardagen i departementsfellesskapet er prega av varierte og utfordrande arbeidsoppgåver. Vi har eit omfattande og viktig samfunnsoppdrag, og hos oss får du høve til å vere med på å utvikle den statlege politikken og forvaltninga av politikkområda våre.

Kultur- og likestillingsdepartementet er del av eit departementsfellesskap som er miljøsertifisert, og vi jobbar aktivt og systematisk med berekraftsansvaret i sektorane våre.

Inkluderande arbeidsliv og mangfald

Vi meiner at mangfald er ein styrke. Vi ønskjer medarbeidarar med ulik kompetanse og livserfaring og ulike fagkombinasjonar og perspektiv slik at vi kan løyse oppgåvene våre endå betre.

Kultur- og likestillingsdepartementet har som mål å tilsetje fleire personar frå underrepresenterte grupper. Les meir om krava for positiv særbehandling på arbeidsgjevarportalen (https://arbeidsgiver.dfo.no/strategisk-hr/inkluderingsarbeid/bli-bedre-pa-rekruttering/hvordan-skrive-stillingsannonser-som-inkluderer/positiv-saerbehandling-nar-man-soker-jobb-i-staten?size=n_20_n).

Vi vil leggje til rette for medarbeidarar som har særskilde behov. Aktuelle tiltak kan til dømes vere å skaffe tekniske hjelpemiddel, tilpasse møblar eller endre rutinar, arbeidsoppgåver og arbeidstid.

Offentleg søkarliste og kontakt

Dei som søker, må vere merksame på at opplysningar om dei kan bli offentleggjorde sjølv om søkarane ber om ikkje å bli oppførte på den offentlege søkarlista. Departementet vil svare på krav om unntak frå den offentlege søkarlista før ho blir offentleggjord.

Vil du vite meir om stillinga, kan du ta kontakt med Ellen Knutsen på telefon 918 87 014 eller Gunhild Strand Molle på telefon 90 67 38 62.

Om avdelinga og seksjonen

Kulturvernavdelinga er sett saman av to seksjonar og har ansvar for politikkområda arkiv, bibliotek, museum, visuell kunst, litteratur, språk, kulturbygg, immateriell kulturarv, innførsel og utførsel av kulturgjenstandar, samiske saker og krigsgravtenesta. Det femner mellom anna om forvaltinga av Nasjonalbiblioteket, Arkivverket, KORO (Kunst i offentlege rom), Restaureringsverksemda ved Nidaros domkyrkje og Språkrådet. Arbeidet med forskrifter til ny arkivlov vil vere sentralt i avdelinga framover.

Stillinga er plassert i seksjonen KV2. Seksjonen har fagleg ansvar for styringa av Arkivverket, Nasjonalbiblioteket, og KORO (Kunst i offentlege rom), forvaltar tilskot til museum og andre ikkje-statlege institusjonar på kulturvernområdet, og har ansvar for kulturbygg. Arbeidet med regelverk på områda til avdelinga er plassert i seksjonen KV1. Både på det juridiske området og i andre saksfelt i avdelinga blir det lagt opp til eit nært samarbeid og opne liner mellom dei to seksjonane.