Spennande leiarstilling i kulturvernavdelinga

Om stillinga

Kultur- og likestillingsdepartementet (KUD) søkjer ein engasjert avdelingsdirektør til seksjonen som i dag har ansvar for fagområda litteratur, språk, samiske saker, nasjonale minoritetar, inn- og utførsel av kulturgjenstandar og lover under avdelinga sitt område, t.d. arkivlova, pliktavleveringslova, språklova, boklova og stadnamnlova. Seksjonen har ansvar for etatsstyring av Språkrådet og Restaureringsverksemda ved Nidaros domkyrkje.

Som avdelingsdirektør vil du ha det overordna ansvaret for å leie og utvikle seksjonen, som består av ti dyktige medarbeidarar. Du vil spele ei sentral rolle i å forme og implementere regjeringa sin politikk på fagfeltet til seksjonen, og du vil samarbeide tett med både politisk og administrativ leiing i departementet. 

Du vil ha personalansvar, noko som inneber å motivere og utvikle medarbeidarane dine og sikre at seksjonen leverer høg kvalitet på oppgåvene sine. 

Avdelingsdirektøren er med i leiargruppa i avdelinga og rapporterer til ekspedisjonssjefen, som er øvste leiar for avdelinga. 

KUD er eit relativt lite departement prega av mykje offentleg merksemd kring sakene våre. Ansvarsområda er viktige for samfunnet, og arbeidskvardagen kan vere hektisk. Du vil bli del av eit vitalt og tverrfagleg miljø med engasjerte og kompetente medarbeidarar.

Arbeidsoppgåver

• leie, organisere og følgje opp arbeidet i seksjonen  
• ha resultatansvar for oppgåvene i seksjonen
• ha personalansvar for dei tilsette i seksjonen 
• utvikle fagområda og medarbeidarane
• bidra aktivt inn i avdelingas leiargruppe og til å utvikle heile avdelinga
• samarbeide med den politiske og administrative leiinga i departementet og bidra til å utforme og setje regjeringa sin politikk på fagområda ut i livet

Det er viktig at du er fleksibel og open for endringar i porteføljen, og at du kan samarbeide på tvers av seksjonar og avdelingar. 

Kvalifikasjonar

Vi ser etter ein leiar som evnar å motivere og inspirere medarbeidarane sine, og som er ein god relasjonsbyggjar. Du må vere handlekraftig, kreativ og løysingsorientert, ha evne til analytisk og strategisk tenking og kunne utvikle felta seksjonen har ansvar for. Stillinga krev at du er administrativt ryddig og forstår rolla som leiar i eit departement. Det inneber at du òg har god forvaltningskompetanse og forstår politiske prosesser. 

Du må ha:

• høgare utdanning på mastergradnivå
• god forståing av forholdet mellom politikk og forvaltning, og av embetsrolla
• god munnleg og skriftleg formidlingsevne
• gode leiareigenskapar

Det er ein fordel om du har: 

• relevant leiarerfaring
• erfaring frå offentleg verksemd, fortrinnsvis frå eit departement
• innsikt i fagområda til seksjonen og kunnskap om lov- og regelverksarbeid

Personlege eigenskapar:

Vi ser etter ein leiar som

• har motivasjon og interesse for leiing
• har gode evner til å organisere arbeidet, delegere og sørgje forframdrift og gode leveransar til rett tid 
• er initiativrik, utviklingsorientert og har gjennomføringsevne
• skapar samarbeidskultur i seksjonen og på tvers i organisasjonen
• har godt humør og er ein lagspelar

Vi vil leggje vekt på om du er personleg eigna til stillinga og kva motivasjon du har for stillinga og arbeidsområdet.

Stillinga er eit embete, og du må difor vere norsk statsborgar for å bli tilsett. Den som blir tilsett i stillinga må kunna klarerast for tilgang til informasjon gradert HEMMELIG etter sikkerhetsloven.

Vi brukar bakgrunnssjekk frå Semac i rekrutteringsprosessane våre, og godkjend bakgrunnssjekk er ein føresetnad for tilsetjinga.

Arbeidsavtalen vil innehalde ein klausul om mogleg karantene og saksforbod ved overgang til ny stilling utanfor staten.

Vi tilbyr

Kultur - og likestillingsdepartementet har eit kunnskapsrikt og stimulerande arbeidsmiljø med engasjerte, kompetente og resultatorienterte medarbeidarar. Kvardagen er prega av varierte og utfordrande arbeidsoppgåver og eit hyggjeleg og uformelt arbeidsmiljø. Du vil få brukt kunnskapane dine i samarbeid med andre, og gjennom oppgåveløysing får du høve til å halde deg fagleg oppdatert.

Vi held til i trivelege lokale midt i Oslo sentrum. Som tilsett hos oss har du fleksibel arbeidstid, høve til trening i arbeidstida, pensjonsordning og rett til å søkje bustadlån gjennom Statens pensjonskasse. Vi har òg eit eige introduksjonsprogram for nytilsette.

Du vil bli innplassert som avdelingsdirektør i stillingskode 1218 med ei brutto årsløn frå 1 000 000 kroner til 1 200 000 kroner. For spesielt kvalifiserte søkjarar kan høgare løn vere aktuelt.

Som leiar hos oss får du ansvar for spennande og fagleg utfordrande arbeids- og leiaroppgåver, og du får ei aktiv rolle i å leie og utvikle avdelinga. Du må vere fleksibel og kunne bidra i nye eller endra oppgåver.

Inkluderande arbeidsliv og mangfald

Vi meiner at mangfald er ein styrke. Vi ønskjer medarbeidarar med ulik kompetanse og livserfaring og ulike fagkombinasjonar og perspektiv slik at vi kan løyse oppgåvene våre endå betre.

Kultur- og likestillingsdepartementet har som mål å tilsetje fleire personar frå underrepresenterte grupper. Les meir om krava for positiv særbehandling på Arbeidsgiverportalen (https://arbeidsgiver.dfo.no/strategisk-hr/inkluderingsarbeid/bli-bedre-pa-rekruttering/hvordan-skrive-stillingsannonser-som-inkluderer/positiv-saerbehandling-nar-man-soker-jobb-i-staten?size=n_20_n).

Vi vil leggje til rette for medarbeidarar som har særskilde behov. Aktuelle tiltak kan til dømes vere å skaffe tekniske hjelpemiddel, tilpasse møblar eller endre rutinar, arbeidsoppgåver og arbeidstid.

Offentleg søkjarliste og kontakt

Dei som søkjer, må vere merksame på at opplysningar om dei kan bli offentleggjorde, sjølv om søkjarane ber om ikkje å bli oppførte på den offentlege søkjarlista. Departementet vil svare på krav om unntak frå den offentlege søkjarlista før ho blir offentleggjord.

Vil du ha meir informasjon om stillinga, kan du ta kontakt med Erik Saglie på telefon +47 95 99 58 23, eller på e-post til erik.saglie@kud.dep.no

Om avdelinga

Kulturvernavdelinga består av to seksjonar og har ansvar for politikkområda arkiv, bibliotek, museum, visuell kunst, litteratur, språk, kulturbygg, immateriell kulturarv, inn- og utførsel av kulturgjenstandar, samiske saker og krigsgravtenesta. 

Ansvaret omfattar mellom anna styring av Nasjonalbiblioteket, Arkivverket, KORO (Kunst i offentlege rom), Restaureringsverksemda ved Nidaros domkyrkje og Språkrådet.