Overlege ved Klinisk forskingspost for vaksne

Vi har ledig ein 50% fast stilling som overlege ved Klinisk forskingspost for vaksne som kan kombinerast med stilling i ordinær klinisk eining.

Forskingsposten er organisert i Forskings- og utviklingsavdelinga, og har lokaler i Sentralblokka på haukelandsområdet. Posten har i dag fire studiesjukepleiarar og ein helsesekretær i faste fulle stillingar, i tillegg til erfaren overlege i 20% fast stilling. Den utlyste overlegestillinga kan eventuelt delast i to mindre stillingar.

Ved forskingsposten prøver vi ut ny diagnostikk og behandling i eit trygt miljø for pasientar, helsepersonell og forskarar. Forskingsposten gir fagleg og praktisk støtte for alle kliniske einingar i sjukehuset.

Forskingsposten gjennomfører kliniske behandlingsstudiar både for eksterne oppdragsgjevarar, og for sjukehuset. Posten er særleg eigna for tidlegfasestudiar innan diagnostikk og legemiddelbehandling, der det er strenge krav til praktisk gjennomføring og dokumentasjon.

Det er tett samhandling mellom forskingsposten, dei kliniske einingane i sjukehuset og med andre sjukehus. Vi samarbeider og godt med Universitetet i Bergen og andre utdanningsinstitusjonar.

Kliniske behandlingsstudiar er eit satsingsområde for Haukeland universitetssjukehus, og forskingsposten inngår som ein viktig infrastruktur for kliniske behandlingsstudiar.

Det er behov for fleire legar som kan ta ansvar som hovudutprøvar (Principal Investigator) for kliniske behandlingsstudiar. Vi søker erfarne legespesialistar som vil arbeide med kliniske behandlingsstudiar ved Klinisk forskingspost for vaksne i kombinasjon med arbeid ved ei ordinær klinisk eining.

I stillinga rapporterer du til avdelingssjef for Forsking og innovasjon. Avdelinga har ca. 65 høgt kvalifiserte medarbeidarar med ulik fagbakgrunn innan forskings- og innovasjonsstøtte, og har oppgåver for Haukeland universitetssjukehus og Helse Vest.

Arbeidsoppgåver

• Ta hand om førespurnadar om, validering av, og fasilitering av nye studiar
• Vere hovudutprøvar for kliniske behandlingsstudiar i posten
• Gje råd og rettleiing til legar og forskarar ved kliniske einingar i sjukehuset i samband med planlegging og gjennomføring av kliniske behandlingsstudiar
• Følgje opp studiane slik at dei vert gjennomførte og rapporterte frå iht. studieprotokollen, standard operasjonsprosedyrar (SOP), og gjeldande retningsliner for god utprøvingspraksis (GCP)
• Bidra til god informasjonsflyt og samarbeid mellom aktørane
• Vere medisinsk rådgjevar for posten ved behov
• Bidra til kompetanseheving/undervisning av studiepersonell og forskingsstøttepersonell
• Delta i relevante forskingsstøttenettverk
• Andre oppgåver som ligger til Forsking og innovasjon, til dømes bidra i forbedringsarbeid

Kvalifikasjonar

• Godkjenning som legespesialist i relevant spesialitet i Noreg
• Erfaring frå klinisk arbeid og klinisk forsking i sjukehus
• Påbegynt doktorgrad er nødvendig, fullført er ønskeleg
• God munnleg og skriftleg framstillingsevne på norsk og engelsk

Personlege eigenskapar

• Engasjert, strukturert og sjølvstendig
• Gode samarbeidsevner, omgjengeleg og god til å kommunisere
• Fleksibel og med god gjennomføringsevne

Vi tilbyr

• Utfordrande arbeidsoppgåver i eit spanande fagmiljø
• Fleksibel arbeidstid, slik at jobben kan bli tilpassa arbeid i ordinær klinisk eining
• Løn etter avtale

Vi oppfordrar alle søkjarar til å nytte Vitnemålsportalen for å laste opp verifiserte vitnemål og karakterutskrifter, der det er mogleg. Har du utdanning frå utlandet, legg ved godkjenning frå Direktoratet for høgare utdanning og kompetanse.