Studentmedarbeider (konsulent) til Infosenteret ved Det humanistiske fakultet

Kunnskap som formar samfunnet

Gjennom eit sterkt og tett samspel med omverda - globalt, nasjonalt og lokalt - skal vi medverke til eit samfunn bygd på kunnskap, ferdigheiter og haldningar.

Vil du vere med å forme framtida?

Video: https://youtu.be/vtJLmcUJ3-w

Studentmedarbeidar til infosenteret ved Det humanistiske fakultet

Velkomen som søkjar til ei fast stilling som studentmedarbeidar (konsulent) i skranken til infosenteret ved Det humanistiske fakultet. Infosenteret ved Det humanistiske fakultet tilbyr informasjons- og rettleiingstenester for studentar på årsstudium, bachelor-, lektor- og masterprogram.

Stillinga lar seg kombinere med å vere student. Det er lagt opp til omkring to vaktar per veke etter arbeidsplan, med moglegheit for ekstraarbeid etter avtale i periodar med behov, til dømes ved semesterstart og ferieavvikling. Det er viktig at den som blir tilsett kan jobbe ved semesterstart og ta ekstravakter ved behov. 

Det er ynskjeleg med oppstart snarast mogleg. 

Arbeidsoppgåver:

Stillinga har varierte oppgåver, med hovudoppgåver som:

• Praktisk rettleiing i skranken ved infosenteret. 
• Svare på telefon og e-post i UiBhjelp.
• Svare på konkrete spørsmål om emne og studieprogram ved fakultetet.
• Gje informasjon om eksamen og eksamensordningar, og gjeldande lover og reglar.

Andre arbeidsoppgåver kan kome i tillegg til skrankevakt. Døme på dette kan vere praktisk tilrettelegging ved arrangement og omvising på campus for ulike grupper. Vakttida kan variere innafor infosenteret sine opningstider, som er kvardagar kl. 10-14 (9-15 i studiestartvekene haust og vår). Infosenteret er ope delar av sommaren.

Kvalifikasjonar og personlege eigenskapar:

• God kjennskap til Det humanistiske fakultet og til UiB generelt.
• Erfaring frå studentverv, studentorganisasjonar, eller oppdrag som mentor, seminarleiar eller liknande blir lagt vekt på.
• God kjennskap til Studentweb, MittUiB og UiB sine nettsider.
• Du er serviceinnstilt, sjølvstendig og initiativrik.
• Du kommuniserer godt, både skriftleg og munnleg.
• Du har evne til å jobbe systematisk og ryddig.
• Du har god rolleforståing.

Vi kan tilby:

• Eit godt og fagleg utfordrande arbeidsmiljø. 
• Brutto årsløn på 452.000,- i full stilling (løn som konsulent, kode 1065). For særleg kvalifiserte søkjarar kan det bli aktuelt å vurdera høgare løn.  
• Stilling i ei inkluderande arbeidslivsverksemd (IA-verksemd). 
• Gode velferdsordningar.

Generell informasjon:

Utfyllande opplysningar om stillinga kan ein få ved å vende seg til leiar av infosenteret, Ayla Tessem på e-post ayla.tessem@uib.no eller telefon 55 58 23 14. 

Spørsmål om den elektroniske søknadsprosessen kan rettast til Det humanistiske fakultet på e-post: fakadm@hf.uib.no.

Opplysningar om søkjaren kan bli gjort offentlege sjølv om søkjaren har oppmoda om ikkje å bli ført på søkjarlista. Dersom oppmodinga ikkje blir teke til følgje, skal søkjaren varslast om dette.

Mangfald er ein styrke og gjer at vi kan løyse oppgåvene våre endå betre. UiB treng difor kvalifiserte medarbeidarar uavhengig av kjønn, etnisitet, religion, livssyn, funksjonsnedsetjing, seksuell orientering, kjønnsidentitet, kjønnsuttrykk og alder.

Vi oppmodar søkjarar med funksjonsnedsetjing, innvandrarbakgrunn eller hól i CV-en til å søke. Dersom du kryssar av for dette i søknaden kan du bli positivt særbehandla. Vi inviterer alltid minst ein kvalifisert søkjar frå kvar av desse gruppene til intervju. 

Nærare om tilsettingsprosessen her. (https://www.uib.no/hr/74251/ansettelsesprosessen)