Velkommen til Teina, einebustad til sals i Hennebygda

Teina har vore mitt paradis på jord sidan 2018 då eg overtok etter dei som bygde huset og anla hagen. No skal eg vidare og Teina treng nye folk til å bu og trivast her.
Ein seier at det avgjerande ved sal av bustad er beliggenheit, og det gjeld her som andre stader, ikkje grunna nærleik til skule, barnehage eller butikkar, men i fantastisk utsyn, ro og godt naboskap. Skule, kulturtilbod og tenester når ein på 15 minuttar i bil.
Hennebygda er ei levande grend der folk bryr seg - i positiv forstand, og der fellesskap og samarbeid framleis er verdiar som blir haldne i hevd.
Huset vart totalrenovert, utvendig og innvendig, med hjelp av gode handverkarar i 2018 og har både "sjel" og særpreg. Her er plassbygt kjøkken frå Espe i open planløysing med romsleg eteplass, 2 stoverom, 3 koselege soverom, moderne, flislagt bad og eit stort, lyst stoverom i underetasjen som eg har brukt til arbeidsrom og ekstra overnattingsplass.
Eitt av soveromma har ull heildekkingsteppe, elles har alle primærrom pussa og hardvoksolja furugolv.
Varmepumpe, 2 gode vedomnar i stovene, panelomnar i soverom og golvvarme i gang og bad sørgar for oppvarming.
Huset må opplevast - velkommen inn.

Teina ligg øvst i bakken opp frå Hennevegen med panorama-utsikt over bygda, fjorden og fjella. Huset og hagen er omgitt av bøar der dyr beiter sommarstid. Næraste naboar er gardsbruka og frukthagane nedanfor. Her er frodig vegetasjon, svært gode vekstforhold og nært til skog og mark. Om ein ønskjer ro, stillheit og fred i sinnet er dette staden ein kan finne det.

Hennebygda ligg ved Nordfjorden, 17 km frå Nordfjordeid og 10 km langs Panoramavegen frå Lote fergekai. Tilkomst via privat stikkveg frå hovudvegen gjennom bygda.

Årlege utgifter
Feiing/tilsyn: kr 1109,28
Renovasjon, standardabonnement: kr 5018,40 (Standard med komposteringsfråtrekk: kr 3759)
Slamtømming, privat septiktank: kr 2085

Den store hagen omgir huset i bakken. Her er god jord, svært gode vekstforhold og variert gamal og ny beplanting. Grønsaker og prydvekstar har vore dyrka utan bruk av giftige kjemikaliar og med respekt for jorda.