Rådgivar/ seniorrådgivar - naturforvaltning

Vi har ledig stilling i eit toårig engasjement som seniorrådgivar/rådgivar innanfor naturforvaltning.
 
Aktuelle oppgåver vil vere saksbehandling, arbeid med verneplanprosessar, informasjons- og skjøtselstiltak i verneområde, bistå i arbeidet med forvaltning av vilt- og rovvilt samt oppfølging av våre oppgåver på området med framande artar, og elles andre prioriterte oppgåver innanfor naturforvaltningsfeltet. Arbeidet vil innebere utstrekt samarbeid med lokale og regionale styresmakter, organisasjonar og grunneigarar.
 
Stillinga ligg i verksemdsområde berekraftig naturbruk og er plassert i seksjon for naturforvaltning. Stillinga er i hovudsak tillagt ansvar for saksbehandling etter naturmangfaldlova. Føremålet med naturmangfaldlova er å ta vare på mangfaldet i naturen ved berekraftig bruk og vern. Oppgåvene våre omfattar mellom anna forvaltning av verneområde og av trua og sårbare artar og naturtypar, arbeid med nytt vern og forvaltning av eksisterande verneområde, viltforvaltning og arbeid med framande artar. I denne jobben får du høve til å påverke korleis dette blir gjennomført i praksis.
Den som blir tilsett må rekne med å kunne bli tillagt andre oppgåver innanfor Statsforvaltaren og seksjon for naturforvaltning sitt ansvarsområde, avhengig av kva oppgåver som til ei kvar tid er prioriterte og kva erfaring/kompetanse søkjar har.
 Til å utføre desse oppgåvene søkjer vi etter ein person med:

• naturfagleg utdanning frå universitet eller høgskule (mastergrad eller tilsvarande)
• god kunnskap om terrestrisk økologi
• evne til å ta initiativ og arbeide sjølvstendig og målretta
• god evne til skriftleg og munnleg formidling
• gode samarbeids- og kommunikasjonseigenskapar
• god vurderingsevne og samfunnsforståing

Førarkort er ein føresetnad. Det vil bli lagt vekt på personlege eigenskapar. Det vil vere ein fordel med erfaring frå saksbehandling av oppgåver med forvaltning av natur og areal.
 
 
  Hos oss får du

• ein utfordrande jobb i eit utviklande og godt fag- og arbeidsmiljø
• ein stabil arbeidsgivar med fleksibel arbeidstid
• løn som 1434 rådgivar/1364 seniorrådgivar med lønsplassering ut frå kvalifikasjonar, erfaring og lokal lønspolitikk. Stilling som seniorrådgivar har større ansvar og særskilte krav til kompetanse innan fagområdet
• tilsetting etter gjeldande lover, instruksar og reglement. Dei første seks månadene er prøvetid
• medlemskap i ei av landets beste pensjonsordningar, Statens pensjonskasse (SPK). Vi trekker 2 prosent av løna di, og i tillegg betaler vi eit innskot til pensjonsordninga di. I SPK får du særs gode pensjons- og forsikringsordningar samt gunstige vilkår for lån til bustad (https://spk.no/Medlemskap-i-SPK)
• moglegheit for noko heimekontor når det er føremålsteneleg
• høve til å trene i arbeidstida

Les meir om godane ved å jobbe i staten på Arbeidsgiverportalen (https://arbeidsgiver.dfo.no/lonn-goder-og-reise) 
 
Vi bruker som hovudregel nynorsk som skriftspråk. Den som vert tilsett må beherske norsk både skriftleg og munnleg. Utviklinga av organisasjonen vår er ein kontinuerleg prosess, og den som vert tilsett må vere open for endringar i organisering, oppgåver og ansvarsområde.Mangfald
Eit godt arbeidsmiljø er prega av mangfald. Vi ønskjer medarbeidarar med ulike kompetansar, fagkombinasjonar, livserfaring og perspektiv for å bidra til ei enda betre oppgåveløysing. Vi oppfordrar difor alle kvalifiserte kandidatar til å søkje utan omsyn til alder, kjønn, funksjonsevne eller etnisk bakgrunn. Du er også velkomen til å søkje sjølv om du ikkje kan vise til ein samanhengande yrkeskarriere. Vi legg til rette for medarbeidarar som har behov for det.

Har du ei funksjonsnedsetting, hol i CV-en eller innvandrarbakgrunn, kan du bli positivt særbehandla om du set kryss for dette når du søkjer stillinga. Du kan lese meir om dette på arbeidsgivarportalen (https://arbeidsgiver.dfo.no/positivsaerbehandling). 
Praktisk informasjon om søknadsprosessen
Alle som søkjer stillinga må søkje digitalt. Når søknadsfristen går ut, vurderer vi søknaden din på bakgrunn av informasjonen du har sendt oss. Det er difor viktig at du både i søknadsbrevet og CV-en, viser korleis kompetansen din fyller krava som er satt i utlysinga.
 
Det er viktig at du registrere all relevant utdanning og erfaring i profilen du opprettar i rekrutteringssystemet (sjølv om du legg ved ein ferdigutfylt CV). Dette er mellom anna nødvendig for å ivareta kravet om fullstendig søkjarliste.
 
Relevante vitnemål og attester lastar du opp. Vitnemål og/eller karakterutskrifter kan du gjerne hente frå vitnemålsportalen. Har du utdanning frå utlandet, legg du ved godkjenning frå NOKUT/Direktoratet for høyere utdanning og kompetanse. Vedlegg lastar du opp i PDF-format.
 
Offentleg søkjarliste blir utarbeidd etter søknadsfristens utløp. Om du ønskjer å reservere deg frå den offentlege søkjarlista, må du grunngje dette særskilt. For at vi skal kunne vurdere ønskjet ditt om reservasjon, må du grunngje konkret kva for ulempe det vil ha for deg å stå på den offentlege søkjarlista. Du vil bli varsla om ønsket ditt ikkje vert tatt til følgje. Vi gjer merksam på at søkjarlista kan bli offentleg sjølv om du som søkjar ber om anonymitet jf. offentleglova § 25.  
 Om oss
Statsforvaltaren er Kongen og Regjeringa sin fremste representant i fylket. Vi har ansvaret for å informere om statleg politikk og sette handlingsplanar ut i livet. Oppgåvene er i hovudsak rettleiing, tilsyn og klagebehandling retta mot enkeltpersonar, kommunar og bedrifter. Dette gjeld innan kommuneøkonomi og forvaltning, sosial- og familierettslege saker, samfunnstryggleik og beredskap, helse, utdanning, landbruk og miljøvern. Vi er ein kompetansearbeidsplass med om lag 150 medarbeidarar som jobbar for visjonen vår «Trygg framtid for folk og natur».
Har du spørsmål om stillinga? Ta gjerne kontakt med rekrutterande leiar Linda Aaram på telefon (Norge +47) 97503185.
 
Søknadsfrist: 21. april 2025